جويريه حقى انا 6

حذيفة : امي تعالي عايزك في كلمتين في الشقة التانية ..

فريدة : خير فيه حاجة يا ابني..

حذيفة بقلق: لا مش هينفع هنا…تعالي هناك مش عايز چوري تسمع.

فريدة بفضول: حاجة تخص العروسة!؟

حذيفة بضيق : ايوة يا ستي حاجة تخص العروسة ..يالا بقي قبل ما چوري تخرج..

خرج هو ووالدته ودخلوا الشقة التانية علشان حذيفة يحكي لامه اللي حصل وفضل يعمل كدة…علشان احساس چوري وما اسمعش اللي اتقال عليها….

بس چوري فهمت عكس كدة…فضلت تبكي بكسرة ووحدة…افتكرت انه عايز يخلص منها علشان العروسة وكمان كلام فريدة ليها في المطبخ..انها سبب في تأخير جوازة حذيفة لحد دلوقتي وانها دايما بتبوظ اي جوازة…كل ده وجعها وبتصرف طفولي برئ لبسة هدومها واخدت هدوم ليها في شنطة مدرستها وخرجت بهدوء ونزلت …

حذيفة خلص كلام مع امه: ده اللي حصل منهم. المهم بقي يا امي من فضلك نأجل شوية موضوع الجواز ده وسبيه بظروفه..

فريدة بحزن وخيبة امل: لا اله الا الله…واخرتها ايه. هو انت يا ابني دايما حظك قليل كدة…

حذيفة ابتسم: ادعيلي انتي بس وانا بإذن الله قدري هيبقي مرضي من عند ربنا…ياللا روحي ارتاحي بقي..انتي تعبتي اوي النهاردة. ربنا يديم عليكي الصحة والعافية..

فريدة ابتسمت: ويخليك ليا يارب…ومين عارف يمكن ربك بيدبر كل ده علشان يحفظك وينقذك من اي شر وسوء…

حذيفة: اللهم امين.. ياللا يا امي روحي ارتاحي…

خرجت فريدة ودخلت شقتها وبعد شوية ندهت علي حذيفة بصوت عالي وبتبكي..

حذيفة خرجلها بسرعة وخوف: مالك يا امي في ايه.!؟

فريدة بخوف: چويرية…چوري مش في البيت ..ولا في اي حتة وواخدة هدوم ليها وشنطة مدرستها مش موجودة…البت طفشت يا حذيفة طفشت…اااه يا مراري. .انا السبب.انا السبب..ضايقتها واتهمتها انك السبب في فركشة كل جوازة…انا السبب. حبيبتي يا بنتي…يا تري روحتي فين ..يا قلب امك..

حذيفة بيستوعب اللي سمعه…قلبه هيخرج من الدق والخوف…عقلة هيطير فكرة فيه كل الافكار السيئة والوحشة…

حذيفة بصدمة : انتي يا امي ! ليه كدة حرااام عليكي…دي عيلة ذنبها ايه…ما كفاية اللي شافته من الدنيا. جاية تحمليها ذنب غيرها. …يا تري راحت فين ..يا تري جري ليها ايه. الله يسامحك يا امي ..الله يسامحك..

فريدة بدموع ورعب: ربنا يستر…يارب سلم.. يارب احميها. ..دي فيها الطمع. يارب احفظها يارب.دي غلباانة