بعد ما عرفوا اني قدمت استقلتي

هناء قعدت بكل برود، وحطت رجل

على رجل، وبصت لمدحت اللي كان مستني منها تبرير: 

**هناء:** «بص يا مدحت، عشان منضيعش وقت طنط.. أنا قدمت استقالتي وقعدت في البيت. يعني مفيش مرتب، ومفيش تحويلات، ومفيش فيزا بتدفع “أوتوماتيك” من ورايا. أنا النهاردة زيك بالظبط.. “عاطلة”.»

**مدحت (بصدمة):** «استقلتي؟! من غير ما تقوليلي؟ طب ومصاريفنا؟ طب وأمي؟ وأختي اللي كانت مستنية فلوس دروس العيال؟»

**هناء:** «عبير أختك عندها إيدين ورجلين، وتنزل تشتغل زي ما أنا كنت بشقى. والست زينات عندها بنتها “حبيبتها” تشيلها. أنا شيلت 7 سنين، لحد ما وسطى انقطم، وفي الآخر لما بشتري طقم لنفسي بيبقى عيني فيه خرم إبرة. أنا دلوقتي قررت أستريح، زيك كدة بالظبط يا مدحت.. مش أنت بقالك 3 سنين مستني “الفرصة الكبيرة”؟ أديني جيت قعدت جنبك نستناها سوا.»

**الست زينات (بصوت عالي):** «إنتِ أكيد اتجننتي! ده واجبك.. دي عيلة جوزك! عايزة تشمتي فينا الغريب والقريب؟»

**هناء:** «الواجب ده بيبقى بين ناس بتقدر، مش ناس بتعتبرني “ماكينة صرافة”. الفلوس اللي كنت بدفعها لكم، أنا أولى بيها دلوقتي عشان أعرف أعيش. ومن النهاردة، الفطار والغدا اللي هيتحط، مدحت هو اللي هينزل يجيب لوازمه.. بفلوسه اللي محوشها، أو ينزل يشتغل أي حاجة، “تليق بمقامه” أو “متليقش”.»

**مدحت:** «إنتِ بتلوي دراعي يا هناء؟»

**هناء:** «لأ يا حبيبي، أنا بس “عدلت المايل”. الحنفية اتقفلت يا مدحت، واللي عايز يشرب.. يحفر بيره بنفسه.»

بصت هناء لحماتها

اللي كانت مبرقة ومش مصدقة إن “هناء الهادية” بقيت كدة:
**هناء:** «نورتي يا طنط.. بس معلش، مش هقدر أعزمك على الغدا النهاردة، عشان “مدحت” لسه منزلش السوق.» 

الست زينات خدت شنطتها وهي بتبرطم بكلام مش مفهوم، وخرجت ورزعت الباب وراها، ومدحت وقف في نص الصالة، لأول مرة يحس إن السقف اللي كان شايلاه هناء فوق دماغه.. بدأ يقع عليه فعلاً متوفره على روايات واقتباسات مرت ساعتين ومدحت لسه واقف مكانه، عينه بتروح وتيجي في الصالة اللي كانت ديماً مترتبة “بفلوس هناء”، ودماغه بتودي وتجيب. فجأة، تليفونه رن.. كانت “عبير”.

**مدحت (بزهق):** «أيوة يا عبير.. مش وقتك خالص.»

**عبير (بصوت عالي وسوقي):** «يعني إيه مش وقتي يا مدحت؟ أمك جاتلي البيت بتصوت، وبتقول إن الهانم مراتك طردتها ووقفت الفواتير! والعيال ليهم مصاريف درس الرياضة النهاردة، والبت “جنى” عايزة تشتري الجاكيت اللي قولت لهناء عليه.. هي الفلوس اتأخرت ليه؟»