اياس

إياس مصور أفراح، بس لو سألت أي حد يعرفه هيقولك إن إياس أكتر واحد بيكره الجواز في الدنيا. مش بيكرهه كده وخلاص، لأ ده بيكرهه عن عقيدة، عن تجربة، عن رصيد طويل من القرف شافه بعينه. إياس عنده تمانية وعشرين سنة، بدأ تصوير من وهو في الجامعة، كان بيصور صحابه في الرحلات، بعدها واحدة بقى بيصور خطوبات، كتب كتاب، لحد ما مرة واحد صاحبه قاله تعالى صورلي فرحي، ومن ساعتها وهو لابس في الحيطة، بقى مصور الأفراح الأول في المنطقة كلها. بس المشكلة إن كل فرح كان بيصوره، العلاقة كانت بتبوظ بعده. أول فرح صوره كان لولد وبنت كانوا بيحبوا بعض من ثانوي، قصة حب سبع سنين، والكل كان بيقول عليهم روميو وجوليت، صورهم، وعملهم سيشن جامد على النيل، وبعد الفرح بشهرين بالظبط اتطلقوا، عرف إن العريس كان بيكلم واحدة تانية من أيام الخطوبة. تاني فرح، بنت خالته تسنيم، كانت بتحب جوزها حب عبط، بتعيط لو اتأخر عليها ربع ساعة، إياس صور فرحها وهو مقهور عشان شايفها طايرة من الفرحة، بعدها بتلات شهور جوزها سابها وسافر الكويت ومارجعش، وطلع متجوز هناك اصلا. حياة، بنت كانت معاه في الشغل، اتجوزت واحد أكبر منها بعشر سنين، قالوا ده هيشيلها في عينيه، إياس صور الفرح، وبعدها اكتشفوا إنه بخيل بخل يخليك تكره الفلوس، وبيضربها كمان. وهكذا، فرح ورا فرح، قصة ورا قصة، لحد ما إياس بقى عنده يقين إن الكاميرا بتاعته نحس، أو إن الجواز نفسه هو اللي نحس، فبقى يدخل أي فرح وهو وشه مقلوب، يصور وهو بيبرطم، يقول للعريس اضحك يا حبيبي اضحك دلوقتي وبكره هتعيط، ويقول للعروسة يا عروسة افرحي النهاردة عشان بكره هتندمي. الناس كانت بتضحك على كلامه وتفتكره بيهزر، بس هو مكانش بيهزر، هو كان شايف النهاية قبل ما تبدأ. كان عنده صاحب مقرب اسمه زيد، زيد ده كان صاحبه من حضانة، متربيين سوا، زيد عكس إياس تماما، رومانسي، بيؤمن بالحب، وكل شوية يحب واحدة ويجي يحكي لإياس، وإياس يقوله هتفشل، فيفشل فعلا، لحد ما زيد زهق منه وقاله يا عم انت اللي نحس. وكان فيه رائف، ده مصور تاني، منافس لإياس، بس على خفيف، رائف كان شايف إن إياس موهوب فشخ بس كئيب، وكان دايما يقوله يا ابني انت بتصور فرح مش جنازة، اضحك شوية. أما بيسان بقى، فدي كانت الحكاية كلها. بيسان صاحبته المقربة، مش صاحبته عادية، دي أخته اللي مش من أمه، يعرفها من أولى جامعة، هي اللي علمته ازاي يظبط الإضاءة، هي اللي كانت بتستحمل قرفه وموده الوحش، هي اللي لما كان بيكتئب كانت بتجيله البيت وتقوله قوم يا معفن خد دش وشوف شغلك. بيسان كانت بتحب واحد اسمه زيد، آه هو هو زيد صاحبه، القصة كانت متلخبطة شوية، بيسان بتحب زيد من زمان، وزيد بيحب بيسان بس كان خايف يخسرها كصاحبة، لحد ما في يوم زيد جمع شجاعته وراح اعترفلها، وبيسان طارت من الفرحة، وإياس كان واقف في النص بينهم مش عارف يفرح ولا يزعل، فرحان إن اتنين من أقرب الناس ليه لقوا بعض، وزعلان عشان عارف إن أي قصة بيدخل فيها فرح بتنتهي بخراب. المهم، زيد وبيسان اتخطبوا، والخطوبة كانت جميلة، إياس هو اللي صورها، وحاول على قد ما يقدر يكون متفائل، بس جواه كان فيه صوت بيقول هتبوظ، هتبوظ زي اللي قبلها. الخطوبة طولت سنة، سنة كاملة بيسان بتحضر للفرح، بتحلم بالفستان، بالميكب، بالزفة، بالبيت اللي هيعملوه سوا، وزيد كان بيحبها بجد، ده كان واضح لأي حد، بس إياس كان ملاحظ إن زيد في الفترة الأخيرة بقى مشغول، تليفونه مبيبطلش، بيخرج كتير بحجة الشغل، ولما بيسان تكلمه يقولها معلش مضغوط. إياس قال لنفسه ده العادي بتاع أي راجل قبل الجواز، بيبقى مضغوط ومش طايق نفسه، بس كان فيه حاجة غلط، حاجة هو كراجل فاهمها، نظرة زيد بقت تايهة، مش زي الأول. جه يوم الفرح. القاعة كانت في مكان على النيل، كلها نور وورد، بيسان كانت زي القمر، فستانها أبيض منفوش، وميكب خفيف مخليها بريئة، كانت بتعيط من الفرحة كل خمس دقايق، وكل شوية تمسك إيد إياس وتقوله أنا مش مصدقة يا إياس أخيرا هتجوز زيد، أنا بحبه أوي. إياس كان بيبلع ريقه بالعافية، وبيقولها ربنا يسعدك يا بيسو، وبيصورها وهو قلبه مقبوض. الفرح بدأ، والزفة دخلت، وزيد كان لابس بدلة سودة وشكله حلو، بس وشه كان متوتر، عرقان، وعينه كل شوية تروح على الموبايل اللي في جيبه. لمحة نيوز إياس كمصور محترف، عينه بتلقط التفاصيل الصغيرة، بيشوف اللي محدش بيشوفه، شاف زيد كل ما الموبايل يتهز في جيبه جسمه يتشد، شافه مرة دخل الحمام وقعد ربع ساعة، شافه بيبص وراه كتير كأنه مستني حد يطب عليه. في وسط الهيصة، إياس نزل يصور الناس اللي بترقص، لقى بنت واقفة بعيد، لابسة فستان أسود قصير، شكلها حلو بس عينيها حمرا كأنها معيطة، كانت بتبص على الكوشة، بتبص على زيد تحديدا، ونظرتها مش نظرة واحدة جاية تبارك، دي نظرة واحدة موجوعة، واحدة قلبها مكسور. إياس صورها صورة بالغلط، ولما قرب يعمل زوم عشان يشوف ملامحها، لقى زيد شافها، ووشه اتخطف، اتخطف بجد، كأنه شاف عفريت. زيد قام من الكوشة فجأة، وقال لبيسان هروح الحمام بسرعة، وراح ناحية البنت اللي بره. إياس قلبه وقع في رجليه، ساب الكاميرا لرائف اللي كان جاي يجامل، وقاله كمل تصوير ثواني، ومشي ورا زيد من غير ما حد ياخد باله. وقف ورا عمود، وسمع كل حاجة. البنت كانت بتقوله حرام عليك يا زيد، انت بتعمل فيا كده ليه، انت وعدتني إنك هتسيبها، انت قلتلي إنك مش بتحبها وإنك معاها عشان العشرة بس، ازاي تتجوزها النهاردة، ازاي قدرت تعمل كده فيا. زيد كان بيحاول يسكتها، بيقولها وطي صوتك، امشي من هنا دلوقتي، هنتكلم بعدين، أنا مضطر، أهلي ضاغطين عليا، بيسان بتحبني ومش هقدر أجرحها قدام كل دول، امشي يا حياة أبوس إيدك امشي. اسمها حياة، البنت دي اسمها حياة. إياس حس إن الدم فار في دماغه، زيد، زيد صاحبه اللي متربي معاه، اللي بيسان بتحبه حب العبادة، بيخونها، وبيخونها مع واحدة تانية، وبيقول عليها إنه مش بيحبها، وإنه معاها عشان العشرة. كان عايز يدخل يضربه، يمسكه من بدلة الفرح يقطعهاله، بس مسك نفسه، مش عشان زيد، عشان بيسان، لو عمل فضيحة دلوقتي الفرح هيتقلب جنازة، وبيسان هتموت فيها. رجع القاعة وهو بيترعش، لقى بيسان بتدور عليه، بتقوله كنت فين يا إياس، تعالى صورني مع زيد، إياس بص لزيد اللي رجع الكوشة ووشه مخطوف، وبص لبيسان اللي عينيها بتلمع، ومعرفش يعمل إيه. صورهم، صورهم وهو حاسس إنه بيصور جريمة، كل فلاش كان بيوجعه، كل ضحكة مزيفة من زيد كانت بتقطع فيه. الفرح خلص، والناس مشيت، وبيسان حضنت إياس حضن كبير وقالتله شكرا إنك كنت جنبي النهاردة يا أحلى مصور في الدنيا، أنا عمري ما هنسى اليوم ده. إياس روح بيته، منامش، فضل يتقلب لحد الصبح، الصور على اللاب قدامه، صورة بيسان وهي بتضحك، وصورة زيد وهو بيبص على موبايله، وصورة حياة وهي بتعيط في الضلمة لوحدها. تاني يوم، بيسان كانت المفروض مسافرة مع زيد شهر العسل، بس إياس كلمها قالها عايزك ضروري قبل ما تسافري، حاجة تخص شغلك، تعالي الاستوديو. بيسان جت وهي لابسة ومتشيكة ومبسوطة، أول ما دخلت قالتله إيه يا عم فيه إيه مستعجل كده ليه، إياس قعدها، وجاب اللاب، ووراها الصور، ووراها الفيديو الصغير اللي صوره بالموبايل من ورا العمود من غير ما حد ياخد باله، صوت زيد وهو بيقول أنا مش بحبها. بيسان وشها اتحول، الضحكة اتمسحت، عينيها وسعت، وفضلت ساكتة دقيقة كاملة، بعدها قالتله ده مش زيد، انت مركب الصوت، انت بتكره الجواز فعايز تبوظ عليا فرحتي، انت طول عمرك كده يا إياس، كئيب ونظرتك سودة. إياس قالها يا بيسان أنا عمري ما هأذيكي، أنا لو عليا كنت اتمنى الصور دي تبقى مش حقيقية، بس ده اللي حصل، أنا شفته بعيني، والبنت دي اسمها حياة وكانت في الفرح. بيسان قامت وقفت، دموعها نزلت، قالتله انت كداب، زيد بيحبني، زيد مستحيل يعمل كده، انت اللي بقيت بتشوف كل حاجة فاشلة زيك، وخرجت جري وسابته. إياس افتكر إنها مش هتصدقه، وإنها هتسافر وهتتصدم بعدين، بس اللي حصل إن بيسان مروحتش، راحت على بيت زيد، واجهته بالصور، وزيد في الأول أنكر، بعدها انهار واعترف بكل حاجة، قالها إنه كان بيحب حياة قبلها، وإنها رجعت تظهر في حياته قبل الفرح بشهر، وإنه اتلخبط ومبقاش عارف هو عايز مين، وإنه كان فاكر إنه لما يتجوز بيسان هينسى حياة. بيسان سابته في نفس اللحظة، رجعت بيت أهلها، وطلبت الطلاق قبل ما حتى الجواز يتم، قبل الدخلة، قالت أنا مش هبدأ حياتي بكذبة. الناس كلها اتقلبت، أهلها كانوا هيتجننوا، أهل زيد جم يبوسوا إيدها عشان ترجع، وزيد نفسه جه عند الاستوديو بتاع إياس وقعد يعيط زي العيال، قاله أنا ضيعت كل حاجة، ضيعت بيسان وضيعت حياة، أنا كنت غبي. إياس مكانش طايق يبص في وشه، بس قاله انت مش غبي، انت جبان، كنت جبان إنك تواجه نفسك وتقول انت عايز مين، فخسرت الاتنين. بعدها بشهر، بيسان جت لإياس الاستوديو، كانت خاسة شوية بس عينيها بقت أنضف، قالتله أنا كنت زعلانة منك، بس عرفت إنك الوحيد اللي محبش يمثل عليا، كل الناس كانت بتسقف وتقول مبروك وهما شايفين إن فيه حاجة غلط، وانت الوحيد اللي قلت الحقيقة حتى لو كانت بتوجع. قالتله أنا مش زعلانة إني متجوزتش، أنا زعلانة إني كنت هتجوز واحد مش شايفني، بس فرحانة إنك أنقذتني بدري. إياس ضحك لأول مرة من كتير، وقالها تصدقي إن دي أول مرة فرح أصوره وينتهي نهاية صح، حتى لو النهاية طلاق قبل ما يبدأ. بيسان ضحكت وقالتله ما انت طول عمرك بتصور النهاية، المرة دي صورت البداية، بدايتي أنا من غير كذب. ومن يومها إياس بطل يكره الجواز، مش لأنه بقى مؤمن بيه، لأ، بس بقى مؤمن إن مش كل فرح لازم يفشل، ساعات الفرح اللي بيبوظ بيكون هو نفسه الفرح الحقيقي، لأنه بينقذ حد من جوازة غلط. وبقى لما حد يقوله يا إياس ما تفرحش شوية وانت بتصور، يقولهم أنا بفرح، بس بفرح لما أشوف اتنين بيبصوا لبعض بجد، مش بيبصوا على الموبايل. أما بيسان، ففتحت مع إياس الاستوديو، بقت هي اللي تعمل سيشن للعرايس، وإياس يصور، وبقوا يكتبوا على الحيطة بتاعة الاستوديو جملة كبيرة: إحنا بنصور الحقيقة، مش الفستان.