كبرياء الذهب
بعدها بأسبوع لقوا عمران جايب عاصم وأبوه علي وجايين يطلبوا إيد نادية، علي أبو عاصم قال يا عمران احنا جايين نرد الجميل، عاصم عايز نادية من زمان ودهبها هنرده فوقه بوسة، عمران فرح وقال ألف مبروك، نادية كانت واقفة ورا الباب بتسمع وبتغلي، قالت لأبوها مش موافقة، قالها هتوافقي غصب عنك، انتي فاكرة حد هياخدك بعد ما بقيتي من غير دهب، كلام أهل البلد هينهش فيكي، عاصم سمع الكلمة دي واتوجع، كان فاكر نادية هتفرح، بس شاف في عنيها نظرة كره أول مرة يشوفها.
نادية وافقت في الآخر عشان كلام الناس، بس كانت ناوية توري عاصم الويل، اتجوزوا في شقة صغيرة فوق بيت أبوه علي، يوم الفرح نادية مكنتش بتضحك، كانت لابسة فستان بسيط ومش طايقة حد يلمسها، عاصم كان بيحاول يفرحها، جاب لها ورد وقالها أنا عارف إنك زعلانة على الدهب بس أوعدك هرجعه لك حتة حتة، نادية بصت له بقرف وقالت له دهب إيه اللي هترجعه، انت خدت دهبي عشان تتجوزني، انت طمعان فيا، عاصم اتصدم وقالها أنا عمري ما طلبت دهبك، أنا أبويا هو اللي قال لي عمك باع الدهب عشان يساعدنا، أنا حتى معرفتش إلا بعد ما اتباع، نادية ضحكت بسخرية وقالت له بطلوا الحركات دي، انت وأبوك زي بعض.
بدأت حياتهم جحيم، نادية كل يوم تذله، لو جاب لها أكل تقول له ده على قد فلوسك، لو كلمها كلمة حلوة تقول له وفر كلامك، كانت بتصحى من النوم تقلب وشها وتسيب البيت وتروح تقعد عند نيرة بالساعات، ونيرة تقولها حرام عليكي يا نادية عاصم بيحبك وبيشتغل ليل نهار في الورشة عشان يعوضك، نادية تقولها ده بيمثل، عاصم كان بيستحمل وساكت، كان بيحبها بجد ومش عايز يخسرها، كان كل ما يقبض يجيب لها حتة دهب صيني ويقولها خلي دي معاكي لحد ما أجيب لك الحقيقي، كانت ترميها في وشه وتقول له أنا مش عايزة منك حاجة.
أمها أماني كانت بتيجي تزورها وتلاقيها معيطة، تقولها يا بنتي جوزك راجل طيب، نادية تقولها طيب إيه ده حرامي وطمعان، أماني كانت عارفة جوزها عمران هو اللي عمل كده من غير ما يقول لعاصم، بس كانت خايفة تقول لبنتها لحسن البيت يتخرب أكتر، وعمران كان كل ما يشوف عاصم يحس بالذنب بس كبرياؤه مانعه يعترف.
عدى شهر على جوازهم ونادية كل يوم بتزود في القسوة، في يوم عاصم تعب في الشغل ووقع على إيده واتعور جامد، رجع البيت إيده ملفوفة بشاش وكلها دم، نادية شافته ومحنّتش، قالت له شكلك اتخانقت كالعادة، عاصم مقدرش يمسك نفسه، صرخ فيها وقالها كفاية بقى، أنا مستحملك عشان بحبك بس انتي بتدوسي على قلبي كل يوم، أنا ذنبي إيه إذا كان عمك هو اللي باع دهبك من غير ما أعرف، أنا كنت فاكرك بتحبيني زي ما بحبك، نادية سكتت لأول مرة وحست إن كلامه طالع من قلبه بجد.
