بنت اسمها جميله
بقوا يستنوا كلام بعض، جميلة تصحى الصبح تلاقي مسج منه صباح الخير يا ناقدتي اللدودة اللي مبتنامش، وهي ترد صباح الخير يا كاتب الغبرة اللي فاكر نفسه نجيب محفوظ.
ماجد بقى يبعت لها فويس نوت وهو بيقرا مقطع كتبه وياخد رايها، وهي بقت تسمع صوته وتحس ان صوته دافي وحنين ومليان حنية عكس ما كانت فاكرة انه مغرور وصوته خشن، وبقت تعيد الفويس اكتر من مرة قبل ما تنام وتحفظه.
وجميلة بقت تبعتله اللي بتكتبه، وهو يقولها لا الجملة دي حلوة اوي، لا خلي البطلة قوية شوية زيك، لا خليها عنيدة زيك، وهي كانت بتتكسف وتفرح في نفس الوقت وتحس ان حد اخيرا بيشجعها وبيشوفها.
التحدي اللي كان اسبوع بقى اسبوعين وهما ولا كتبوا حاجة عدلة، بس كتبوا لبعض مئات الرسايل، كل رسالة فيها حتة من قلبهم، كل رسالة فيها ضحكة وخناقة صغيرة وصلح، لحد ما بقوا لو يوم عدّى من غير ما يتكلموا يحسوا ان فيه حاجة ناقصة وان اليوم مالوش طعم.
رباب لاحظت ان جميلة اتغيرت، بقت سرحانة طول الوقت وماسكة الموبايل وتضحك لوحدها وتعمل القهوة وتسرح وتكلم القطة هدير كأنها بتحكيلها، قالت لها انتي وقعتي يا جميلة، انتي حبيتيه يا هبلة، جميلة اتخضت وقالت لا طبعا ده عدوي ولسه هكسبه في التحدي، رباب قالت لها العدو اللي بتحبي صوته وتستني رسايله وتسهري عشانه ده يبقى حبيب مش عدو.
نفس الكلام قاله بدر لماجد، قاله انت بتحب البنت دي يا ماجد، انت من ساعة ما عرفتها وانت بطلت تنزل بوستات حزينة وكئيبة، وبقيت تضحك وتكتب حاجات فيها امل ونور، ماجد سكت لانه عرف انه فعلا حبها، حب روحها وعنادها وطريقتها وضحكتها اللي بيسمعها في الفويس، من غير ما يشوف شكلها، لانهم كانوا متفقين من الاول محدش يبعت صورته للتاني لحد ما التحدي يخلص عشان الحكم يبقى نزيه ومفيش مجاملة.
ماجد قرر يسمي الرواية اللي بيكتبها دلوقتي حبيبتي من ورق، لانها فعلا حبيبته اللي عرفها من ورق الشات ومن ورق الكتب، حبيبته اللي اتكونت من حروف وكلام.
جميلة كمان كانت بتكتب رواية وسمتها نفس الاسم من غير ما تقول، لانها حست انه خلى حياتها الورقية اللي بتحبها ليها معنى، وخلى الورق اللي بتحبه يتكلم وينطق باسمها.
وفي يوم ماجد قالها انا عندي حفلة توقيع لروايتي الجديدة بعد يومين في دار نشر كبيرة في وسط البلد، وعايزك تيجي ضروري، عايز اشوفك لاول مرة هناك، وعايز اعرف شكل البنت اللي خطفت قلبي وخلتني احب الكتابة تاني، جميلة اتوترت جدا، قالتله وانا كمان عايزة اشوفك، بس انا خايفة اوي، قالها متخافيش، انا هعرفك لوحدي، انتي اللي هتبقي مختلفة عن كل الناس، وقلبك هينور وشك وهعرفك من اول نظرة.
