بنت اسمها جميله
ورباب قالت لها طب هتكتبي عن ايه، جميلة قالت مش عارفة، انا عمري ما كتبت رواية، انا بس بعرف انتقد واقول ده وحش، بس عمري ما جربت اكتب الحلو.
اما ماجد فحكى لصاحبه بدر، بدر ده صاحبه من ايام الجامعة ومصمم جرافيك وبيصممله اغلفة رواياته وبيقعد معاه على القهوة كل يوم، بدر قعد يضحك وقاله انت هتتحدى بنت من الكومنتات يا ماجد، انت فاضي والله، قاله لا دي بنت مستفزة ولازم اربيها واعرفها مقامها، بدر قاله يا عم دي شكلها هتربيك انت وهتخليك تحب الكتابة من اول وجديد.
التحدي بدأ، جميلة كل يوم بعد شغلها في مكتبة صغيرة كانت بتشتغل فيها بتاعت عمها صادق، عمها صادق ده راجل طيب وبيحبها زي بنته وبيقولها يا جميلة انتي اللي منورة المكتبة، كانت تقعد على اللاب توب بتاعها القديم وتحاول تكتب، تكتب سطرين وتمسحهم، تكتب فكرة وتلاقيها شبه رواياته، كانت هتتجنن وتشد في شعرها.
ماجد نفسه كان واقع في نفس المشكلة، هو متعود يكتب بطريقة معينة والجمهور حافظها، البطل الحزين والبنت اللي بتستناه، بس المرادي كان عايز يكتب حاجة مختلفة عشان يثبت انه جامد ومش بيكرر نفسه، فكان بيقطع الورق كتير ويشرب سجاير كتير ويقوم يتمشى في الاوضة.
بعد تلات ايام جميلة زهقت بجد، راحت فاتحة الشات بتاع ماجد وكتبتله على فكرة انت بتعمل بلوك للأفكار عندي، انا من ساعة ما اتحديتك وانا مش عارفة اكتب كلمة واحدة، قالها وانتي كمان والله، انا مش عارف اكتب من ساعة ما اتحديتك وحاسس اني نسيت الكتابة، قعدوا يضحكوا لاول مرة من غير خناق وصوتهم طلع في الشات كأنهم اصحاب من زمان وبيهزروا.
ومن هنا الكلام خد سكة تانية خالص، بقوا كل يوم يتكلموا بالساعات، في الاول عن الكتابة وعن الشخصيات، وبعدين عن حياتهم، جميلة عرفت ان اسمه الحقيقي ماجد صادق، وانه خريج تجارة بس بيحب الكتابة من وهو صغير وكان بيكتب جوابات لامه وهي مسافرة، وانه وحيد وبيقعد يكتب طول الليل عشان ميحسش بالوحدة وبيخاف من السكوت.
وهو عرف ان جميلة بتشتغل في مكتبة عمها صادق بعد ما ابوها مات، وانها بتحب القهوة بزيادة وبتعملها بطريقة معينة بريحة حبهان، وان عندها قطة اسمها هدير، اه والله سمت القطة هدير، وبتحب تسمي كل حاجة حواليها، حتى الزرعة اللي في البلكونة مسمياها هدير برضه، ولما سألها ليه هدير قالتله عشان بحب الاسم ده بيحسسني ان فيه حد بيونسني وان فيه صوت حلو في البيت.
