اختي انكرت وجودي
كانت لابسة فستان أبيض، ووشها مليان فرحة مصطنعة. لكن أول ما عينيها وقعت عليا، ابتسامتها اختفت. الكوباية اللي في إيدها اتهزت، وبصتلي كأنها مش مصدقة. — مريم؟! الضيوف بدأوا يتهامسوا. — مين الضابطة دي؟ — هي تبع العريس؟ — إيه اللي جاب الشرطة العسكرية هنا؟
أما كريم، فبصلي باستغراب، وبعدها لف ناحية أبوه. اللواء شريف كان واقف قدام منصة صغيرة في مقدمة القاعة، ولما شافني، اتجمد مكانه. إيده ارتفعت تلقائيًا ناحية الندبة اللي جنب صدغه، ووشه شحب. نزل من على المنصة بخطوات سريعة، وقرب مني.
— مستحيل! وقفت قدامه بثبات. — خير يا فندم؟ فضل باصصلي لثواني، وبعدها قال بصوت مهزوز: — إنتِ مريم بنت محمود الشهاوي؟ أول ما سمعت اسم أبويا، قلبي دق بعنــ,,ـــــف. — أيوه. حضرتك تعرف أبويا؟ لف ناحية الضيوف وقال بصوت عالي: — محدش يبدأ أي مراسم دلوقتي. الفرح هيتوقف شوية. القاعة كلها سكتت.
نادين جريت ناحيتنا، وهي بتحاول تبتسم قدام الناس. — يا بابا، إيه اللي بيحصل؟ دي أختي، بس واضح إن فيه سوء تفاهم. مريم أكيد جاية تعتذر عن إنها… قاطعها اللواء بصوت حاد: — تسكتي يا نادين! نادين اتصدمت. عمرها ما تخيلت إن الراجل اللي كانت بتحاول ترضيه طول الوقت يكلمها بالطريقة دي.
أما أنا، فكنت لسه مش فاهمة حاجة. اللواء قرب مني وقال: — ممكن نتكلم في مكان خاص؟ — طبعًا يا فندم، بس قبل أي حاجة، أنا عايزة أعرف حضرتك تعرف أبويا منين. هز راسه وقال: — هتعرفي كل حاجة. بس لازم تسمعي القصة من أولها. وبعدين لف ناحية ابنه. — كريم، تعالى معانا.
كريم قرب وهو باصص لأبوه بقلق. أما نادين، فمسكت دراعه. — كريم، إنت مش هتسيبني واقفة كده، صح؟ بص لها نظرة طويلة، وبعدها فك إيدها من دراعه بهدوء. — نادين، أنا محتاج أفهم اللي بيحصل. وسابها واقفة وسط القاعة، لأول مرة من غير ما تلاقي حد ينفذ اللي هي عايزاه.
اللواء شريف قفل الباب، وطلب من الجميع يقعدوا. وبعد لحظة صمت، بدأ يتكلم: — من ستاشر سنة، كنت في مهمة عسكرية صعبة جدًا، وكانت مهمتي وقتها إني أستلم مجموعة من المستندات المهمة من أحد الضباط قبل نقلها لجهة مختصة.
حصل هجوم مفاجئ على الطريق، والعربية اللي كنت فيها اتقلبت، واتصبت إصابة خطيرة في راسي. سكت لحظة، ولمس الندبة. — فضلت محاصر تحت حطام العربية، والنــ,,ـــــار بدأت تقرب مني. كنت فاكر إن دي نهايتي. لحد ما ظهر راجل مدني كان معدي بالطريق، اسمه محمود الشهاوي.
